काठमाडौं– भारत भ्रमणमा रहेका उपप्रधानमन्त्री तथा परराष्ट्रमन्त्री कमल थापाले मधेसी मोर्चा र सरकारबीच आर्थिक नाकाबन्दी हटाउने विषयमा तीन चरणको राजनैतिक सहमति भएको दाबी गरेका छन् । Kamal-Thapa1-300x300

भारतीय पत्रिका द हिन्दुले थापाको भनाई उद्धृत गर्दै लेखेको छ , ‘प्रारम्भिक अवस्थामा रहेको सम्झौता अघि बढ्नका लागि सबै स्टेकहोल्डरहरुको साथ, सहयोग र सुझवुझ आवश्यक छ ।’
तीन महिना लामो नाकाबन्दीपछि नेपालमा उग्रवादी सोच राख्नेहरु उत्साहित भएका कारण त्यसलाई समाप्त पार्न यो सम्झौता भएको उनले बताएका छन् ।
‘हामीले उग्रवादी शक्तिहरुलाई नेपालको राजनैतिक प्लाटफर्म प्रयोग गर्नबाट रोक्नु जरुरी थियो, त्यसैले नेपालीको भविष्यलाई केन्द्रमा राखेर यो सम्झौता भयो ’, थापाले भनेका छन् ।
यसअघि थापाले भारतीय विदेशमन्त्री सुस्मा स्वराज र राष्टिय सुरक्षा सल्लाहकार अजित दोभलसँग भेटेका थिए । त्यसक्रममा उनले नेपाल भारत सम्बन्धका विषयमा छलफल गर्दै यस सम्बन्धलाई नयाँ ढंगबाट विकास गर्नुपर्ने बताएका थिए ।
उनले नयाँ सम्झौता अनुसार सिमांकनको विषय र मधेसी जनताको सांस्कृतिक तथा राजनैतिक अधिकारलाई सरकारले प्रभावकारी ढंगबाट सम्बोधन गर्ने बताएका थिए । सिमांकनको विषय टुंग्याउन तीन महिना लागेपनि अन्य विषयहरुको कार्यान्वयन तत्कालै गरिएको थापाले बताएका छन् । उनले विगतमा केही समूहले गरेको गल्तीका कारण नेपालले संकट व्यहोरिरहेको बताएको पनि द हिन्दूले जनाएको छ ।
नेपालको समस्या समाधान गर्न संविधान संशोधन नै प्रमुख विषय रहेको पनि उनले बताए । नेपाल सरकारले संविधान संशोधन गर्ने प्रस्ताव संसदमा लगिसकेका कारण यस प्रक्रियामा रहेका दुविधाहरु हट्ने पनि उनले बताए ।
जाडोका कारण हिउँ पर्ने समय अघि आईसकेका बेला थापाले भारत भ्रमण गरेर नाकाबन्दी खोलिदिन अनुरोध गरेको समाचारमा जनाइएको छ