राजमार्गको पुल ध्वस्त पार्न यसरि सिलिन्डर बम फिट गरियको थियो तर योजना विफल
 |
राजविराज : पूर्व–पश्चिम राजमार्गस्थित सप्तरीको पोर्ताहा गाविसस्थित महुली पक्की पुल ध्वस्त पार्ने योजना विफल भएको छ । ध्वस्त बनाउन राखिएका दुईवटा सिलिण्डर बम विष्फोट नभएपछि महुली पुल क्षति हुनबाट जोगिएको हो ।
पोर्ताहा–७ मा पर्ने पूर्व–पश्चिम राजमार्गस्थित महुली पुलको मुनि १४ किलोका ठूला दुईवटा ग्यास सिलिण्डर नपड्किएको अवस्थामा फेला परेका प्रहरी नायव उपरीक्षक नारायणप्रसाद चिमरियाले जानकारी दिए ।
अज्ञात समूहले पुलमुनि नोबेल कम्पनीको ग्यास भरिएका सिलिण्डरसँगै राखिएको पेट्रोलले भिजेको करिब २५ मिटर लामो डोरीको माध्यमबाट आगो सल्काएर विष्फोट गराउने प्रयास गरेका थिए ।
सवारी साधन स्कर्टिङ्ग भइरहेका बेला विष्फोट भई पुल ध्वस्त भएको भए ठूलो जनधनको क्षति हुने सम्भावना थियो ।
पेट्रोल भिजाइएको जुटको बोराले छोपिएको ग्यास भरिएका सिलिण्डरहरुको रेगुलेटर खुला राखेर ग्यास लिक गरिएको र सिलिण्डरमा जडान गरिएको लामो डोरीमा आगो सल्काएर विष्फोट गराउने प्रयास गरिएको प्रनाउ चिमरियाले बताए ।
प्रनाउ चिमरियाका अनुसार उक्त डोरीको पाँच मिटरसम्म आगोले जलेर निभेकाले सल्काइएको आगो सिलिण्डरसम्म नपुग्दा कुनै क्षति हुन पाएन् । सिलिण्डर बम राखेको सम्बन्धमा हालसम्म कसैले जिम्मेवारी लिएको छैन् ।
फेला परेको सिलिण्डर बमलाई निष्क्रिय बनाउन राजविराजस्थित श्री कृष्ण दल गणबाट नेपाली सेनाको बम डिस्पोजल टोली घटनास्थल पुगेको थियो ।
फेला परेको सिलिण्डरहरु हटाइएपछि विहानैबाट आवागमन सुचारु भएको इलाका प्रहरी कार्यालय कञ्चनरुपका प्रहरी निरीक्षक मेघराज अधिकारीले बताए ।
यसअघि गत मंसिर ५ गते राति भारदह र रुपनीमा राजमार्ग अवरोध गर्न बसेका केही मधेसी मोर्चाका कार्यकर्ताको प्रहरीसँगको झडपमा केहीको मृत्यु भएपछि आक्रोशित प्रदर्शनकारीहरुले आवागमनमा अवरोध पुर्याउने उद्देश्यले मंसिर ६ गते पूर्व–पश्चिम राजमार्गको बरमझियास्थित सुन्दरी खोलाको पुल तोडफोड गरी क्षति पुर्याउने प्रयास गरेका थिए ।
संयुक्त लोकतान्त्रिक मधेसी मोर्चाले आन्दोलनलाई राजमार्ग केन्द्रित बनाई अवरोध गर्न थालेपछि र सार्वजनिक तथा निजी सम्पतिमाथि आक्रमणको क्रम बढेपछि प्रहरीले रातको समयमा स्कर्टिङ्ग गरेर सवारीसाधनहरु गन्तव्यसम्म पुर्याउँदै आएको छ ।
केन्द्रीय सुरक्षा समितिले कुनैपनि हालतमा राजमार्ग अवरुद्ध हुन नदिने भनेर एकीकृत सुरक्षा योजना बनाएको छ ।
राजमार्गको अवरोध हटाउन तथा सार्वजनिक सम्पतिको सुरक्षा गर्न केन्द्रित रहेको उक्त योजनाअन्तर्गत नेपाल प्रहरी, सशस्त्र प्रहरी र राष्ट्रिय अनुसन्धानका अधिकारीहरु संयुक्त रुपमा खटिएका छन् ।
यो योजना, आन्दोलन चर्किएको पूर्वमा सप्तरीदेखि पर्सासम्म र पश्चिममा नवलपरासीदेखि बाँकेसम्म लागू गरिएको छ ।
0 comments
प्रतिक्रिया दिनुहोस्...
कृपया आफ्नो प्रतिकृया यहाँ लेख्नुहोस् ।