जंगीअड्डामा जर्नेलहरुको विशेष भेला see more at:-
 |
'विधिसम्मत आदेश पाए सेना तयार हुनुपर्छ '
काठमाडौं : मुलुकको पछिल्लो असहज अवस्था र नेपाली सेनाको भूमिका बारेमा सैनिक मुख्यालयमा आइतबार विशेष छलफल भएको छ ।
छलफलमा बहालवाला उच्च सैनिक अधिकृतसँगै पूर्वसेनापति तथा अवकाशप्राप्त जर्नेलहरुलाई पनि बोलाइएको थियो ।
प्रधानसेनापति राजेन्द्र क्षेत्रीको विशेष पहलमा आयोजना गरिएको भेलामा तराई मधेस आन्दोलन, भारतीय नाकाबन्दी, आपूर्तिमा निरन्तर अवरोधलगायतका असहज अवस्थाले राष्ट्रिय सुरक्षामा उत्पन्न गरेको चिन्ता र चुनौतीबारे गम्भीर छलफल भएको छ।
मुलुकको राजनीतिक र सुरक्षा अवस्था अन्यन्त गम्भीर मोडमा पुगेको निश्कर्ष निकाल्दै जंगीअड्डाको छलफलले राजनीतिक तहमा तत्काल समाधान खोजिनुपर्नेमा जोड दिएको छ ।
छलफलमा पूर्वसेनापतिहरु रुक्मांगद कटवाल, छत्रमानसिंह गुरुङ, अर्जुनरसिंह राण, प्यारजंग थापालगायत पूर्व सेना प्रमुखहरु सहभागी थिए। त्यसैगरी पूर्व रथीहरु बालानन्द शर्मा, चित्रबहादुर गुरुङ, नेपालभूषण चन्दलगायतका अवकाश प्राप्त उच्च सैनिक अधिकृतहरु पनि छलफलमा सहभागी भएका थिए।
कार्यक्रमको प्रारम्भमा प्रधान सेनापति राजेन्द्र क्षत्रीले स्वागत मन्तव्य दिदै मुलुकको असहज अवस्था र राष्ट्रिय सुरक्षामा देखिएका जोखिम तथा चुनौती प्रस्तुत गरेका थिए ।
भेलामा सहभागी एक पूर्व सैनिक अधिकारीका अनुसार अधिकांश जर्नेलहरुले तराईमा उत्पन्न भएको परिस्थिति राजनीतिक समस्या भएकोले यथाशिघ्र राजनीतिक तवरबाटै समस्याको समाधान हुनुपर्ने धारणा राखेका थिए।
राष्ट्र नै संकटमा परेका बेला सेना ब्यारेकमा चुप लागेर बस्न नहुने बताउँदै पूर्वजर्नेलहरुले विधिसम्मत आदेश पाए सेना खटिन तयार हुनुपर्ने सुझाव दिएका थिए।
तराई मधेस आन्दोलनको पृष्ठभूमि र प्रकृति राजनीतिक भए पनि यसमा अपराधिक घुसपैठसमेत हुन थालेको विश्लेषण सुनाउँदै पूर्व जर्नेलहरुले राजनीतिक समाधानसँगै सुरक्षा व्यवस्थापन र कारबाही पनि सशक्त पार्नुपर्ने तर्क राखेका थिए।
तराई मधेसको समस्यालाई बेलामै सम्बोधन तथा समाधान नगरिए यसले मुलुकको राष्ट्रिय सुरक्षा र राष्ट्रिय एकता समेत खतरामा पर्ने चिन्ता व्यक्त गरेका थिए। सिंगै मुलुक दुई महिनादेखि ठप्प हुँदा पनि निकास खोज्न राजनीतिक तहबाट जुन गम्भीरताका साथ पहल हुनुपर्ने हो, त्यो हुन नसकेको गुनासो पनि उनीहरुले गरेका थिए।
नेपाली सेनाका प्रवक्ता सहायकरथी ताराबहादुर कार्कीले सेनाको परम्पराअनुसार नै यस्तो कार्यक्रम आयोजना गरिएको जानकारी स्पष्ट पारे।
सहायकरथी कार्कीले अन्नपूर्ण अनलाइनसँग भने, 'पूर्वप्रधान सेनापति तथा अवकाश प्राप्त उच्च अधिकृतहरुलाई नेपाली सेनाको वर्तमान अवस्थाबारे जानकारी दिदै सेवा निवृत्तहरुको लामो परिस्कृत अनुभव तथा ज्ञान र सिपको उपयोग गर्ने उद्देश्यले छलफल आयोजना गरिएको हो।'
यस्ता छलफल र अन्तरक्रियाले सेनालाई अझ बढी सक्षम एवं सवल बनाउन बस्तुगत आधार प्रदान गर्ने विश्वास नेपाली सेनाले लिएको कार्कीले बताए। प्रवक्ता सहायकरथी कार्कीका अनुसार नेपाली सेना संविधानसम्मत् विधी र प्रक्रिया पुर्याई नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताको रक्षार्थ एवं आमजनताको जीउधन सुरक्षाको लागि अवस्था, परिस्थिति र आवश्यकता अनुरुप तैनाथीको लागि तयारीमा रहनुपर्ने धारणा तथा सुझावहरु प्राप्त भएका छन्।
0 comments
प्रतिक्रिया दिनुहोस्...
कृपया आफ्नो प्रतिकृया यहाँ लेख्नुहोस् ।